انا وضميرى

[b]حدثتنى احد اصدقائى ذات يوم بهذا الحديث :

بسم الله الرحمن الرحيم
السلام عليكم
العنوان غريب شويه بس اصبروا عليا للآخر
موضوعي النهارده مختلف شويتين


خليني ادخل في الموضوع


النهارده كان ضميري بيتخانق معايا و بيجري ورايا بعصايه عادي يعني
بتحصل كتير عادي يعني .. المهم سبب الخناقه
كنت راجعه النهارده من السفر في عربيه عادي و بسمع اغاني من الام بي فور (حاجه كده لا محصله راديو ولا ام بي ثري)
المهم ضميري طبعا مسبنيش في حالي و دار بيني و بينه الحوار ده



الضمير : ازيك يا بوسي .. ايه ان شاء الله .. كام مره هقولك بطلي اغاني و انتي في العربيه


بوسي : ايه يا عم فيه ايه ؟ ايه اللي طلعك دلوقتي؟؟


الضمير(بيزعق) : ايه يا بوسي ؟ ازاي تسمعي اغاني .. افرضي لا قدر الله العربيه اتقلبت بيكم و انتي متي؟؟ هتفرحي كده؟


بوسي : اتقلبت ايه و بتاع ايه .. ايه الفال ده بس ياعم دلوقتي؟؟ ما الشارع ادامك جميل و حلو اهو ادعي بس نوصل بالسلامه


الضمير(بيزعق اكتر) : مافيش حاجه اسمها فال ولا مفالش .. ده شيء متوقع و بعدين حتى لو الشارع جميل ممكن تطلع عربيه من تحت الارض تبوظ الدنيا ولا ايه .. مهو كل شيء جايز حتى جواز العجايز


بوسي: خلاص يا عم اهدى ماتعملش كده .. عايز ايه انت؟؟


الضمير (براحه شويه): يا بوسي افهميني .. افرضي حصل اي حاجه .. بلاش العربيه اتقلبت .. مثلا جالك سكته قلبيه .. و موتي هتفرحي كده؟؟ لانك لو متي هتبعثي على الوضع و الاغاني دي اكيد .. مهياش حلوه يعني بصراحه في حقك


بوسي : ... (مابتردش)


الضمير : سكتي ليه يا بوسي؟؟ و بعدين انا مش بكلمك في حكاية لو متي دلوقتي بس .. لا انا بقولك بوجه عام يا بوسي .. الاغاني حرام اصلا و انتي بتحبي ربنا و المفروض تسيبيها
يعني - ولله المثل الاعلى - لو انتي بتعملي حاجه و والدك اتضايق منها و انتي طبعا بتحبي والدك .. بربك مش هتسيبها؟


بوسي : اكيد


الضمير : و انتي بتحبي ربنا اكتر من والدك .. ليه بقى مش تسيبي الاغاني


بوسي : ما كل الناس بتسمعها يا ضميري ...


الضمير : دي دايما كلمة العاصي اللي بيحاول يدافع بيها عن نفسه .. بوسي ماتسمعيش الكلام ده
الناس اللي بتقولي عليهم دول .. لما ربنا ييجي يحاسبك و يقولك ليه سمعتيها و هي حرام .. هتقولي له الناس كانوا بيسمعوها .. الناس دول هيتبروا منك يوم القيامه يا بوسي .. محدش راح ينفعك غير نفسك و عملك اسمعي الكلام ده كويس .. ده من القرآن يا بوسي (يوم يفر المرء من امه و ابيه و صاحبته و اخيه)


بوسي : معاك حق يا ضميري .. بس .. (لسه هتكمل راح الضمير مقاطعها)


الضمير : مابسش يا بوسي .. بصي الاغاني ضرتك ازاي
بصي انتي عصبيه ازاي بسببها .. بصي بتحرك شهوتك ازاي .. بصي ازاي غيرت حاجات كتير فيكي
و فوق كل ده بتاخدي ذنوب عاللي بتسمعيه ده و السمع من نعم ربنا عليكي .. ليه تستخدميه غلط يا بوسي !!


بوسي : غلبتني .. انا فعلاً متضايقه اوي من الاغاني و نفسي ابطلها باي شكلي يا ضميري ..


الضمير : طيب لما انتي متضايقه منها بالشكل الفظيع ده .. ما تساعديني بقى و اساعدك و نبطلها .. و اكيد مش مره واحده و متاخديش حكاية مره واحده دي خطوه عشان ترجعيلها تاني .. حكم انا عارف الحركات دي
يعني اول خطوه بلاش اغاني عمال على بطال و انتي في العربيه خدي المشوار ذكر الله و هيعجبك صدقيني
و بعدين تاني خطوه بلاش و انتي شغاله عالنت شغلي قرآن احلى
تالت خطوه حاولي تمعني نفسك عنها
اكيد و انتي قاعده مع جارتك في البلاكونه (كعادتكم يعني) سهرانين مع بعض هتشغلوا اغاني قولي لها لا يا هوبه يا حبيبتي بلاش اغاني و حاولي تنصحيها معاكي لو بتحبيها بجد في الله و اهو تاخدوا ثواب بالمره


بوسي : طيب ابدأ منين ؟؟ عشان امشي عالخطوات دي؟


الضمير : استغفري ربنا .. و ادعي انه يتوب عليكي منها مع محاولتك لكده و اكيد ربنا راح يساعدك
ربنا بيفرح توبة العبد ليه يا بوسي .. و هيفرح بيكي اوي و هيكرمك اوي
و سيبيها بنية انك بتحبي ربنا (من ترك شيئاً لأجل الله عوضه الله خيراً منه)
و ربنا بيقول ( قل يا عبادي الذين اسرفوا على انفسهم لا تقنطوا من رحمة الله ان الله يغفر الذنوب جميعا انه هو الغفور الرحيم)
ارجعي لربنا يا بوسي .. عشان يرضى عنك و يرزقك حسن الخاتمه


بوسي : ان شاء الله


==


الخناقه خلصت لحد هنا
و بعدين ركبت تاكسي و السواق كان مشغل قرآن بصوت الشيخ الحذيفي و بجد كان رااائع و ريح قلبي اوييييييييي لاني كنت متضايقه و شويه شويه هعيط
المهم
الحمد لله رب العالمين روحت البيت كويسه
كان مراة اخويا عندنا خرجت جبت طلبات للبيت و خدتها معايا
و احنا في السكه صاحبتها في الشغل اتصلت بيها عالموبايل و قالت لها ان ابن المدير بتاعهم (ادي تقريباً) مات في حادثه عربيه كان خارج مع تلاته اصحابه و دخل اتوبيس فيهم !!
انا اتصدمت طبعاً و حصل حاجات كتير


بس ضميري طلع في النص


==


الضمير : ها يا بوسي .. كان ممكن تبقي مكانه الصبح و تموتي على معصيه


بوسي : ايه ده انت لسه هنا ..


الضمير : هروح فين يعني .. و هو انا ورايا غيرك ده انتي زهقتيني بجد متعبه


بوسي : ياااه بجد موقف صعب اوي .. مش عارفه هقابل ربنا ازاي تصدق اني مكسوفه من ربنا اوي اوي !!


الضمير : كده اولها خير انك حاسه بذنبك و ندمانه عليه .. بس خدي باااالك الندم لوحده مش كفايه


بوسي : اه والله .. مش عايزه الشيطان يغلبني بجد .. كتير حاولت اقلع عن معاصي كتير , قليل منها عرفت و كتير منها معرفتش بسبب الشيطان


الضمير : الحل بسيط و سهل .. الشيطان ده اضعف مخلوق ربنا خلقه ضعيف ادام النفس القويه مابيعرفش يدخلها منين .. خلي حصنك القرآن و اذكار الصباح و المساء و استبدلي الاغاني بالقرآن
مهو يا بوسي مافيش حد عاقل يصدق ان قلب المسلم يشيل حب القرآن و حب الأغاني
ايه التناقض ده؟؟


بوسي : اه بجد تناقض غريب اوي .. ربنا يرزقنا حسن الخاتمه


الضمير : خلاص .. ايه رأيك نفتح صفحه جديده مع ربنا و تخلي شعارك ( سأحيا بالقرآن) و مش مجرد سماع و بس .. لا اخلاق كمان .. اي نعم المشوار صعب بس ثوابه كبييييييييييييييييير و هتحسي بلحظات ضعف بس استعيني بربنا و استعيذي بالله من الشيطان و مايهميكيش منه اوعي تضعفي يا بوسي ابدا ابدا


بوسي : ان شاء الله مش هضعف ولازم ابدأ صفحه جديده بدل ما حياتي مالهاش معنى كده !


الضمير : بوسي انتي لسه ادامك فرصه كبيره طول مانتي عايشه .. ماتضيعيهاش لان محدش ضامن عمره يا بوسي .. فوقي يا بوسي كفايه بقى !!

بوسي : كفايه بقى يا ضميري الله يسترك

الضمير : خلاص راجعي نفسك كويس .. لانك في اي لحظه ممكن تبقي مكان الولاد دول !!


==


اتصالحت انا و ضميري