وقفت امام تمثال رمسيس أتأمله في دهشه انفتح لها فمي الصغير ليسع جوز فراخ بلدي......واتعجب من عبقرية الفنان المصري القديم .وفجأه وجدت التمثال ينظر لي شرزا في ضيق ويقول !!! :خلاص خلصت بحلقه وبلاه ولا لسه .
انتفضت انتفاضة كبيره وقلت : ب ب بسم الله الرحمن الرحيم !!! هو انت بتتكلم ؟
رمسيس : نا اااعا ااام ..طبعا بتكلم وبشوف كمان يا عبيط ؟
انا : بتشوف ! بتشوف ايه ؟؟
رمسيس : هو انا اللي بشوفه قليل يابني !!؟؟ دانا بشوف بقالي دلوقتي كام سنه وهما حطوني في الميدان ده لما الشمس خدت من قفايا رات .............ويارتها جت ع الشمس وبس .
الا منخيري انسدت من دخان العربيات والمصانع القريبه . ولما أحاول اعطس علشان اتنفس تاني الاقي اللي الله يخيبهم بيعملو زي الناس تحت رجلينا لما الواحد قرف منكم يا شعب حجر .
فين ايام لما كنت متجوز 48 ست ومتدلع ولا الحاج متولي بتاعكو !!!!!!!!!!
انا : انت كمان عرفت ده ؟ طب ياسي رمسيس انت عايز ايه دلوقتي ؟؟؟؟؟؟؟!
رمسيس متنهدا : ااه نفسي ينقلوني حته كده علي مزاجك لحسن شغلانة التمثال ده حاجه وحشه قوي .
وبعدين انا عايز اغير واشوف مناظر جديده .
انا : يعني تحب تبقي جوا حديقه الاوبرا مثلا ؟
صاح رمسيس بغضب كاد ينخلع منه تاجه الحجري الكبير : جاتك نيله عليك وعلي اختياراتك ....اقولك حته علي مزاجك تقولي اوبرا ؟
انا بضيق : رمسيس انت الفاظك بقت مش ظريفه خالص وانا شاكك انك كنت ملك في يوم من الايام .
رمسيس : ماهو من عمايلكو ! من عاشر القوم 40 يوم فهو منهم ... وشوف انا معاشر الخلق ده بقالي قد ايه لما نستوني اسمي .
دانا ياما ورد عليا يابني !!!!!
انا : وتقترح تروح فين يا رمسيس باشا تاني ؟؟
رمسيس حالما : ااه نفسي اروح كده مكان مدلع مروشن ويليق بيا كملك .
اشمعني يعني ابو الهول ! هو احسن مني في حاجه ؟! داساكن جنب الهرم ومروق نفسه ع الاخر .
حاكم بيقولو الهرم احسن من زمان بكتير .
انا : انت هتقولي يا ابو الرماسيس خصوصا
(رمسيس مكملا) ايشي كازينو من هنا واسمع اغنيه من هنا . مش تقولي اوبرا .
قال اوبرا قال !
انا : طب يا سيدي اوصل صوتك للمسؤلين و .............
ر
مسيس : هه ........ موت يا دونكي .
انا : طب قولي بس اي حاجه اقدر اعملها .
رمسيس دامعا : حتعمل ايه يا بني روح الله يسهلك .
- صحت باعلي صوتي-
انا لازم اعملك حاجه . لازم اريحك . كلنا فداك يا رمسيس . كلنا بنحبك يا ابو الرماسيس .
- وفجاة-
وجدت نفسي بين اثنين من رجال الشرطه يسحبونني من امام التمثال بهدوء . ولاقيت امه لا اله الا الله كلها بتتفرج عليا في الميدان .
نظرت لتمثال رمسيس فوجدته واقف كالمتاد لا حس ولا خبر .
زعقت عليه !!! رمسيس !!! قولهم انك كنت بتتكلم معايا . قولهم ان احنا بقينا اصحاب . كلمهم الله لا يسيئك دول فاكريني مجنون . انا ح وديك شارع الهرم !!!!!!!!!!!!!!!
ولم يتكلم رمسيس .
وكنت في غيبوبه منذ 3 سنوات لا اتكلم الا مع رمسيس .
وكنت في عنبر الخطرين بالعباسيه تحت اسم مجنون رمسيس